روايه رائعه جدا الفصول من الاول الي الخامس بقلم الكاتبة الجليله

مش لاقيه 
اول مره شوفتو كنت في اولى اعدادي .. كنت راجعه من المدرسه فتحت الباب لاقيتو قاعد مع ماما بيتكلم .. اول ما شافوني هو و ماما اتوترو و في ثواني كان استأذن و مشي بسرعه .. لما سألت ماما قالتلي انو قريبنا من بعيد و جاي يطمن علينا .. استغربت لان احنا عمرنا ما كان عندنا قرايب يجوو يطمنو علينا بس كنت عيله فا مركزتش اوي ولا حطيت في بالي .. بعدها ب شهر ماما كانت تعبانه اوي قعدتني و حكيتلي كل حاجه و من يومها الحياه اختلفت تماما 
سكتت موج دموعها نزلت في هدوء .. حس بحر ان الموضوع تقيل علي قلبها و تاعبها طبطب عليها 
موج لو مش حابه تكملي عادي خلاص اهم حاجه متكونيش مضايقه 
هزت راسها بالنفي فهم بحر انها عايزه تكمل بس بتستجمع قوتها مش اكتر 
حكتلي انها كانت شغاله في شركه من شركات المنياوي المعروفه سكرتيره ل مكتب ابنهم الكبير .. مع الوقت ابنهم حبها و حاول يقرب منها ب كل الطرق و الاشكال .. في البدايه كانت بترفض القرب منو لكن مع الوقت هي كمان حبتو .. و من كتر ما حبها و حبتو غلطو مع بعض ڠصب عنهم .. لما واجه اهلو انو عايز يتجوزها رفضو بشده خصوصا انو اصلا كان متجوز و عندو عيال و انو لو عمل الي في دماغو و اتجوزها هيحرمو من كل حاجه و يتبرو منو .. و في الوقت ده ماما اكتشفت انها حامل .. اتحط بين انو يأما يختار حبو وماما و بنت لسه مشافتش الدنيا ولا مراتو و عيالو و مركزو و الفلوس و كل الكلام ده .. و طبعا اختار مراتو و عيالو و مركزو .. لكن متخلاش عن ماما .. أمن حياتها و جابلها بيت تعيش فيه معززه حياتها كلها و كان دايما يشوفها محتاجه ايه و يعملو من غير تفكير .. لكن بسببو ماما خسړت حياتها و اهلها و كل حاجه لان محدش قبل بيها ب حمل طفل من غير جواز .. اتولدت و اتكتبت بأسمو و كان بيجي يشوفني من وقت للتاني .. لكن مكنتش اعرفو .. و اليوم الي ماما حكتلي كل ده افتكرت اليوم الي شوفتو فيه و انا راجعه من المدرسه ملامحو اترسمت في مخي .. لدرجه اني لما شوفتو دلوقتي بعد السنين دي كلها عرفتو بسهوله رغم انو اتغير و كبر عن الاول .. هي دي الحقيقه يا بحر .. الحقيقه الي كنت دايما بخبيها و بهرب منها .. الحقيقه الي واجهتها النهارده ڠصب عني .. حقيقه اني موج خالد المنياوي
سكت بحر مكنش عارف يقول ايه